Z tym, zo přesadźimy praktiske naprawy w žiwjenskich rumach mjezybahno, pěskowa hola, chójnina a hat, spěchujemy mnohotnosć družinow w hotspoće 20.
W běhu projektoweho časa chcemy 50 naprawow zwoprawdźić, kotrež přirodoškit spěchuja.
K přirodoškitnym naprawam ličimy mj. dr.:
Intaktne bahna maja wulki wuznam za škit našeje klimy a biologiskeje mnohotnosće. Zo bychu tutomu wuznamej wotpowědować móhli, dyrbja mokre być. Tohodla je jedyn z wažnych zaměrow našeho projekta, mjezybahna, kiž su zwjetša mjeńše, znowa přemačeć. To chcemy docpěć z tym, zo stare wotwódnjace hrjebje zasypamy abo haćenja reparujemy a wobnowimy, kotrež wodu w přestrjeni dźerža. Tež, hdyž wurězamy sćinu, cuzoródne wjerbički a druhe drjewiny, zdźeržimy a spěchujemy bahna.
Zo by so pěskowa hola dołhodobnje zdźeržała je wažne, zo so wobstajnje hlada. Bjez toho, zo so wobstajnje do njeje zapřimnje, zarosće tutón žiwjenski rum z kerčinami a dalšimi drjewinami. Naše naprawy měrja so na optiměrowanje hladanja: Kak móhło so na přikład zarosćenje spomalić? Kak skutkowne je wotstronjenje słanja? Zo bychmy tute prašenja wotmołwili a pěskowu holu zdźerželi, wurězujemy w ramiku projekta na płoninach pěskoweje hole Biosferoweho rezerwata Hornjołužiska hola a haty kerčiny a wotnosymy zwjeršne woršty pódy. Naprawy so wědomostnje přewodźuja.
Na wutkach chude chójniny z wosebitej přizemskej wegetaciju kaž krušwičkami, pazorakami a lišawami so přez wutki z powětra přeměnjeja. Wutki, kotrež přidatnje zemju nasyćeja, wjedu k tomu, zo so konkurenčnosylne družiny štomow jewja, zo sylnje trawa a mochi rostu a z tym rědke družiny wuwostanu. Hdyž tam na mjeńšich płoninach zapřimnjemy a na přikład narosćene drjewiny wurězamy a słanjowu worštu wotstronimy, spěchujemy konkurenčnosłabe zelowe rostliny a lišawy.
Haty jako kumštne wodźizny móža so trajnje jenož zdźeržeć, hdyž je hatarjo wužiwaja a hladaja. Z přesadźenjom naprawow škita a zdźerženja přirody maja so haty jako hospodarski zakład za plahowanje karpow zdźeržeć a runočasnje wohrožene družiny spěchować. W projekće přesadźimy wšelake naprawy. Tak wostajimy haty přez lěto k mineralizowanju worštow błóta ležo abo je wotbłótnimy, sćinu wusyćemy abo twary wobnowimy.